തിരൂരങ്ങാടി താലൂക്ക് ആശുപത്രിയിലെ ഗൈനക്കോളജി വിഭാഗം പ്രവർത്തനം നിലച്ചതോടെ ഗർഭിണികളും രോഗികളും ദുരിതത്തിലായി. ആരോഗ്യവകുപ്പ് അടിയന്തരമായി ഇടപെട്ട് ആവശ്യമായ ഡോക്ടർമാരെ നിയമിച്ച് ചികിത്സാ സൗകര്യം പുനഃസ്ഥാപിക്കണമെന്ന ആവശ്യം ശക്തമാകുന്നു.

രണ്ട് ഡോക്ടർമാർ അവധിയിലായിരിക്കെ മൂന്നാമത്തെ ഡോക്ടർക്ക് സ്ഥലംമാറ്റം നൽകിയതോടെയാണ് ഗൈനക്കോളജി വിഭാഗം പ്രതിസന്ധിയിലായത്. ഒഴിവിലേക്ക് പുതിയ ഡോക്ടറെ നിയമിക്കാതെയാണ് സ്ഥലംമാറ്റം നൽകിയതെന്നാണ് പരാതി.

ചികിത്സയ്ക്കായി ആശുപത്രിയിലെത്തിയ ഗർഭിണികൾക്ക് മറ്റ് ആശുപത്രികളെ ആശ്രയിക്കേണ്ട സാഹചര്യമുണ്ടായതായും ബന്ധുക്കൾ പറയുന്നു. സർക്കാർ ആശുപത്രിയെ ആശ്രയിക്കുന്ന സാധാരണക്കാരെ ദുരിതത്തിലാക്കുന്ന സാഹചര്യം അടിയന്തരമായി പരിഹരിക്കണമെന്നാണ് പൊതുജനങ്ങളുടെ ആവശ്യം.

തിരൂരങ്ങാടി താലൂക്ക് ആശുപത്രിയിൽ ആവശ്യമായ ഡോക്ടർമാരെ ഉടൻ നിയമിച്ച് ഗൈനക്കോളജി വിഭാഗത്തിന്റെ പ്രവർത്തനം പുനഃസ്ഥാപിക്കണമെന്നും ചികിത്സാ സൗകര്യങ്ങൾ ഉറപ്പാക്കണമെന്നും നാട്ടുകാർ ആവശ്യപ്പെട്ടു.