വേങ്ങര: വേങ്ങര ബ്ലോക്ക് പഞ്ചായത്ത് പ്രസിഡന്റ് സ്ഥാനത്തെച്ചൊല്ലി മുസ്‌ലിം ലീഗിനകത്ത് വടംവലി ശക്തമാകുന്നു. പി.കെ. കുഞ്ഞാലിക്കുട്ടിയുടെ ബന്ധുവിനെ പ്രസിഡന്റാക്കാൻ ജില്ലാ നേതൃത്വം നീക്കം നടത്തുന്നതായാണ് വിവരം.

പ്രസിഡന്റ് കെ.കെ. മൻസൂർ കോയ തങ്ങൾ രാജിവച്ചതിനെ തുടർന്നാണ് സ്ഥാനത്തേക്ക് പുതിയ തെരഞ്ഞെടുപ്പ് നടക്കുന്നത്. ലീഗ് ജില്ലാ നേതൃത്വത്തിന്റെ താൽപ്പര്യപ്രകാരമാണ് രാജിയെന്നാണ് സൂചന. ഒഴിവിൽ നിലവിൽ സ്ഥിരം സമിതി അധ്യക്ഷനായ പി.കെ. അബുത്വാഹിറിനെ പ്രസിഡന്റാക്കാനാണ് ജില്ലാ നേതൃത്വത്തിന് താൽപ്പര്യമെന്നാണ് അറിയുന്നത്.

എന്നാൽ കുഞ്ഞാലിക്കുട്ടിയെ എതിർക്കുന്ന വിഭാഗം ലീഗ് മണ്ഡലം സെക്രട്ടറി ഇ.കെ. സുബൈറിനെ പരിഗണിക്കണമെന്ന ആവശ്യവുമായി രംഗത്തെത്തി. പറപ്പൂർ, വേങ്ങര, എ.ആർ. നഗർ, കണ്ണമംഗലം ലീഗ് കമ്മിറ്റികൾ സുബൈറിന് പിന്തുണ അറിയിച്ചതായാണ് വിവരം.

അതേസമയം എടരിക്കോട് ഡിവിഷനിൽനിന്ന് വിജയിച്ച വി.ടി. സുപ്പബൈർ തങ്ങളും പ്രസിഡന്റ് സ്ഥാനത്തേക്ക് മത്സരിക്കാൻ ഒരുങ്ങുന്നുണ്ട്. നേരത്തെ രണ്ടുതവണ പാണക്കാട് നേതൃത്വത്തിന്റെ നിലപാടിനെ മറികടന്ന് വിമതനെ പ്രസിഡന്റാക്കിയ ചരിത്രവും വേങ്ങര പഞ്ചായത്തിനുണ്ട്.

പ്രസിഡന്റ് സ്ഥാനത്തേക്കുള്ള തെരഞ്ഞെടുപ്പ് ഈ മാസം 22ന് നടക്കും.