പൊന്നാനി: റോഡ് മുറിച്ചുകടക്കുന്നതിനിടെ റീടാറിങ് ചെയ്ത ഭാഗത്ത് തട്ടി വയോധിക റോഡിലേക്ക് തെറിച്ചുവീണ് പരിക്കേറ്റു. ആലംകോട്–കിളിമാനൂർ റോഡിൽ ഇന്നലെ രാവിലെ 9.30ഓടെയാണ് സംഭവം.

റോഡിലെ ഉയർന്നുനിൽക്കുന്ന ഭാഗത്ത് തട്ടിയാണ് വയോധിക റോഡിലേക്ക് വീണത്. വീഴ്ചയുടെ സിസിടിവി ദൃശ്യങ്ങൾ പുറത്തുവന്നിട്ടുണ്ട്. റോഡിലേക്ക് വീഴുന്ന സമയത്ത് വാഹനങ്ങളൊന്നും കടന്നുപോകാതിരുന്നതിനാൽ വലിയ അപകടം ഒഴിവായി.

അശാസ്ത്രീയമായ റീടാറിങ്ങാണ് അപകടത്തിന് കാരണമെന്നാണ് നാട്ടുകാരുടെ ആരോപണം. റീടാറിങ്ങിനെ തുടർന്ന് റോഡിന്റെ ഉയരം ക്രമാതീതമായി വർധിച്ചതായും നിരപ്പല്ലാത്ത ടാറിങ് ഭാഗത്ത് തട്ടി ഇരുചക്രവാഹനങ്ങളും അപകടത്തിൽപ്പെടുന്ന സാഹചര്യമുണ്ടെന്നും നാട്ടുകാർ പറയുന്നു.

റോഡിലെ അപകടകരമായ ഭാഗം അടിയന്തരമായി പരിഹരിക്കാൻ അധികൃതർ നടപടി സ്വീകരിക്കണമെന്നാണ് നാട്ടുകാരുടെ ആവശ്യം. അല്ലാത്തപക്ഷം സമാനമായ അപകടങ്ങൾ ആവർത്തിക്കാനുള്ള സാധ്യതയുണ്ടെന്നും അവർ ചൂണ്ടിക്കാട്ടി.