ആദ്യ ടൂർണമെന്റ് നവംബർ 10ന് കിഴിശ്ശേരിയിൽ ആരംഭിക്കും

അരീക്കോട്: ഓൾ സെവൻസ് ഫുട്ബോൾ അസോസിയേഷന്റെ 27-ാമത് മലപ്പുറം ജില്ലാ സമ്മേളനം പൊതുമരാമത്ത് വകുപ്പ് മന്ത്രി പി.കെ. ബഷീർ ഉദ്ഘാടനം ചെയ്തു. ജില്ലാ പ്രസിഡന്റ് യാഷിക് നൈസാം മഞ്ചേരി അധ്യക്ഷത വഹിച്ചു. റഊഫ് എടവണ്ണ പതാക ഉയർത്തി.

ജില്ലാ പഞ്ചായത്ത് പ്രസിഡന്റ് പി.എ. ജബ്ബാർ ഹാജി, മുൻ അന്തർദേശീയ ഫുട്ബോൾ താരം യു. ഷറഫലി, സംസ്ഥാന പ്രസിഡന്റ് ചെറുട്ടി മുഹമ്മദ്, എ.എം. ഹബീബുല്ല, ഷാഹുൽ കൊണ്ടോട്ടി, കെ. കൃഷ്ണൻകുട്ടി, ഫാറൂഖ് പച്ചീരി, മുജീബ് തുവ്വൂർ എന്നിവർ സംസാരിച്ചു. അസോസിയേഷൻ സെക്രട്ടറി സലാഹുദ്ദീൻ മമ്പാട് പ്രവർത്തന റിപ്പോർട്ട് അവതരിപ്പിച്ചു.

ജില്ലയിൽ നടത്താനിരിക്കുന്ന 16 ടൂർണമെന്റുകൾക്ക് സമ്മേളനം അംഗീകാരം നൽകി. ആദ്യ ടൂർണമെന്റ് നവംബർ 10ന് കിഴിശ്ശേരിയിൽ ആരംഭിക്കും.

2025-26 വർഷത്തെ മികച്ച ടൂർണമെന്റായി ആസാദ് വാണിയമ്പലത്തെയും ജനപ്രിയ ടൂർണമെന്റായി ജാസ് മുണ്ടയെയും തിരഞ്ഞെടുത്തു. മികച്ച ടീമായി കെ.ഡി.എസ്. കിഴിശ്ശേരിയും മികച്ച കളിക്കാരനായി ആസി ബെല്ലോ ടെല്ലിയും തിരഞ്ഞെടുക്കപ്പെട്ടു. ഫിഫ മഞ്ചേരിയുടെ സലാം മികച്ച ഗോൾകീപ്പറായും ബ്ലൂ എടപ്പാളിന്റെ യാഷിൻ മാലിഖ് മികച്ച ഡിഫൻഡറായും തിരഞ്ഞെടുക്കപ്പെട്ടു. കെ.ഡി.എസ്. കിഴിശ്ശേരിയുടെ ലൗ ഹരി ജൂനിയർ മികച്ച വിദേശ താരമായും ലക്കി സോക്കർ കൊട്ടപ്പുറത്തിന്റെ സഹദ് പ്രോമിസിങ് പ്ലേയറായും തിരഞ്ഞെടുക്കപ്പെട്ടു. വിജയികൾക്കുള്ള ഉപഹാരങ്ങൾ മന്ത്രി പി.കെ. ബഷീർ സമ്മാനിച്ചു.

അരീക്കോട്ടെ 50 പഴയകാല ഫുട്ബോൾ താരങ്ങളെയും ചടങ്ങിൽ ആദരിച്ചു. പുതിയ ഭാരവാഹികളായി യാഷിക് നൈസാം മഞ്ചേരി (പ്രസിഡന്റ്), സലാഹുദ്ദീൻ മമ്പാട് (സെക്രട്ടറി), ഷാഹുൽ കൊണ്ടോട്ടി (ഖജാൻജി) എന്നിവരെ തിരഞ്ഞെടുത്തു.