മലപ്പുറം: കരിപ്പൂർ അന്താരാഷ്ട്ര വിമാനത്താവളത്തിലേക്കുള്ള യാത്ര കൂടുതൽ വേഗത്തിലും സുഗമമായും ആക്കുന്നതിനായി രാമനാട്ടുകര മുതൽ വിമാനത്താവളത്തിനടുത്തുള്ള കൊളത്തൂർ വരെ നിലവിലുള്ള കോഴിക്കോട്–പാലക്കാട് ദേശീയപാതയിലൂടെ എലിവേറ്റഡ് ഹൈവേ (ആകാശപ്പാത) നിർമ്മിക്കാനുള്ള സാധ്യത ദേശീയപാത അതോറിറ്റി പരിശോധിക്കുന്നു.

രാമനാട്ടുകര മുതൽ കൊളത്തൂർ വരെ നാലുവരിപ്പാതയ്ക്കായുള്ള വിശദമായ പദ്ധതി റിപ്പോർട്ട് (DPR) തയ്യാറാക്കുന്നതിന്റെ ഭാഗമായി സാധ്യതാപഠനം അവസാനഘട്ടത്തിലാണ്. നിലവിൽ നാലുവരിപ്പാത നിർമ്മിക്കാൻ വലിയ തോതിൽ ഭൂമി ഏറ്റെടുക്കലും വ്യാപാരസ്ഥാപനങ്ങൾ ഒഴിപ്പിക്കലും ആവശ്യമായി വരുന്നതിനാൽ, സ്ഥലമെടുപ്പ് ഒഴിവാക്കാൻ കേന്ദ്ര ഉപരിതല ഗതാഗത മന്ത്രാലയം എലിവേറ്റഡ് ഹൈവേ നിർദേശമാണ് മുന്നോട്ടുവെച്ചിരിക്കുന്നത്.

പദ്ധതി യാഥാർഥ്യമായാൽ രാമനാട്ടുകരയിൽ നിന്ന് കരിപ്പൂർ വിമാനത്താവളത്തിലെത്താൻ ഏകദേശം 15 മിനിറ്റ് മാത്രം മതിയാകുമെന്നാണ് വിലയിരുത്തൽ. വിമാനത്താവളത്തിലേക്കുള്ള യാത്രക്കാർക്കും ദീർഘദൂര യാത്രക്കാർക്കും ഇത് വലിയ ആശ്വാസമാകും. നിലവിലെ ദേശീയപാതയിലൂടെ മറ്റ് വാഹനങ്ങൾക്ക് യാത്ര തുടരാനുമാകും.

പദ്ധതിയുടെ അന്തിമ രൂപവും അലൈൻമെന്റും ദേശീയപാത അതോറിറ്റിയുടെ സാധ്യതാപഠനത്തിനും ഡി.പി.ആർ. തയ്യാറാക്കലിനും ശേഷമായിരിക്കും തീരുമാനിക്കുക. പദ്ധതി നടപ്പായാൽ കേരളത്തിലെ ഒരു വിമാനത്താവളത്തിലേക്കുള്ള ആദ്യ എലിവേറ്റഡ് ആക്സസ് ഹൈവേയായിരിക്കും ഇത്.

കരിപ്പൂർ വിമാനത്താവളം മലപ്പുറം ജില്ലയുടെ പ്രധാന അന്താരാഷ്ട്ര കവാടമായതിനാൽ, പദ്ധതി യാഥാർഥ്യമായാൽ ജില്ലയിലെ ഗതാഗത വികസനത്തിനും പ്രവാസികൾക്കും വ്യാപാര മേഖലയ്ക്കും വിനോദസഞ്ചാരത്തിനും വലിയ പ്രയോജനം ലഭിക്കുമെന്നാണ് പ്രതീക്ഷ.